Eredoktorsgrade
Die Universiteit ken jaarliks eredoktorsgrade toe aan buitengewone individue wat hulleself in hulle onderskeie velde onderskei het en 'n beduidende bydrae tot die samelewing gelewer het. Die volgende individue sal by die Maart 2025-gradeplegtighede eredoktorsgrade ontvang:
Jonathan Kenneth Butler: Doktor in die Filosofie (DPhil), honoris causa
Al het hy onder die skadu van apartheid en te midde van swaarkry in Athlone, Kaapstad, grootgeword, was Jonathan Kenneth Butler in ’n tyd van streng rasseskeiding een van die eerste gekleurde kunstenaars op Suid-Afrikaanse radio en televisie. Hy het later een van die sterkste stemme geword wat internasionaal voorspraak gedoen het vir die vrylating van Nelson Mandela en ander politieke gevangenes.
Hoewel hy reeds in Afrika en die Verenigde Koninkryk (VK) naam gemaak het, was dit eers in 1987, toe hy as openingskunstenaar saam met popster Whitney Houston getoer het, dat Butler in die Verenigde State raakgesien is. Daardie selfde jaar maak hy finaal sy deurbraak met sy Grammy-benoemde treffer-enkelsnit “Lies”, wat nommer 27 op die Billboard Hot 100-treffersparade was en by nommer 18 op die VK se Official Singles Chart gaan draai het. Sy en Ruby Turner se weergawe van die Staple Singers se liedjie “If You’re Ready (Come Go with Me)” het ook in daardie tyd nommer 30 op die treffersparades in die VK gehaal. Hy sit sy sukses voort met die vrystelling van meer as 28 albums, insluitende verskeie gospelprojekte, met een wat die eerbiedige "Falling In Love with Jesus" bevat.
Ondanks sy internasionale sukses bly Butler getrou aan sy wortels. Hy is die eerste Globale Vermaaklikheidsambassadeur vir die Lalela-stigting, wat opvoedkundige kunsprogramme vir ho?risikojeug aanbied. Met hulle kunskurrikulum en relevante boodskappe bedien Lalela weekliks meer as 5 000 Suid-Afrikaanse leerders.
Butler gaan voort om populêre musiek in verskeie genres te maak en toer deur die wêreld. Op sy jongste album, Ubuntu, het hy nog 'n droom verwesenlik, naamlik om saam met die ikoniese kunstenaar Stevie Wonder op te tree in sy weergawe van Wonder se liedjie "Superwomen".
Dr Philemon Mphathi Mjwara: Doktor in die Natuurwetenskappe (DSc), honoris causa
Dr Philemon (Phil) Mphathi Mjwara het die afgelope drie dekades aansienlik tot die ontwikkeling van Suid-Afrika se wetenskap-, tegnologie- en innovasiestelsel bygedra. As die voormalige direkteur-generaal van die nasionale Departement van Wetenskap en Innovasie, het hy gesorg dat die wetenskap gebruik word om alle Suid-Afrikaners se lewens te verbeter. Juis vir sy werk in hierdie hoedanigheid het hy in 2020 die Batho Pele Uitnemendheidstoekenning vir Direkteur-Generaal van die Jaar ontvang.
Een van Mjwara se vele bydraes tot die land se wetenskap-, tegnologie- en innovasielandskap was sy rol as leier van die span wat die eerste Suid-Afrikaanse vooruitskouingstudie op die terrein van wetenskap, tegnologie en innovasie (SAForSTI) onderneem het.
Mjwara het die graad HonsBSc (1984) en MSc (1987) aan die Universiteit van Fort Hare verwerf, sowel as ’n PhD (1995) aan die Universiteit van die Witwatersrand. Op akademiese gebied was hy onder meer professor in Wetenskap- en Tegnologiebeleid aan die Universiteit van Pretoria, en Fisika-dosent aan die universiteite van die Witwatersrand, Suid-Afrika en Fort Hare. Hy het etlike navorsingstukke oor fisika, tegnologie-ontleding en tegnologievooruitskouingsprosesse gepubliseer en aangebied.
Hy dien in ’n aantal advies- en oorsigrade, waaronder die direksies van die World of Platinum of South Africa en die Square Kilometre Array Organisation (SKAO). In sy verskeie poste en – straks die belangrikste – as die land se langsdienende direkteur-generaal, het Mjwara ’n enorme bydrae gelewer tot wetenskapbeleide wat daarop gerig is om navorsers te ondersteun en vooruitgang in die Suid-Afrikaanse samelewing te bewerkstellig.
