?Meer as vyf jaar sedert die bekendstelling daarvan het die Universiteit Stellenbosch (US) se wêreldbekende Skool vir Datawetenskap en Rekenaardenke 'n nuwe tuiste in die JC Smuts-gebou gekry waar dit 'n ruimte beslaan "wat vir konneksie, samewerking en verkenning ontwerp is".
Die ruimte, waarna daar in die algemeen as die "datawetenskap-hoofkwartier" verwys word, simboliseer die etos van die skool en verteenwoordig "moontlikheid, vennootskap en doel", het prof Kanshukan Rajaratnam, Direkteur van die Skool, by die simboliese lintknip-geleentheid verduidelik.
Prof Sibusiso Moyo, Viserektor: Navorsing, Innovasie en Nagraadse Studie, het in haar toespraak gesê die skool het plaaslik en internasionaal 'n "krag om mee rekening te hou" geword en homself as 'n spilpunt vir interdissiplinêre, samewerkende navorsing gevestig. Matemba het kommentaar gelewer op die werk wat die Skool saam met die presidensie doen en gesê: "Hierdie [opening] is nie net goeie nuus vir Stellenbosch nie, dit is goeie nuus vir die hele land."
Die geleentheid is deur verskeie hooggeplaastes, studente en belanghebbers, waaronder die US se Rektor en Visekanselier, prof Deresh Ramjungernath, die voormalige Rektor en nou Fondsinsamelings- en Strategiese Projekleier vir die Fakulteit Geneeskunde en Gesondheidswetenskappe (FGGW) en die Sentrum vir Epidemiese Reaksie en Innovasie (SERI), prof Wim de Villiers, en Lawrence Matemba, hoofbeleidsontleder in die Presidensie, bygewoon.
Matemba het in sy kommentaar oor die werk wat die Skool saam met die Presidensie doen, gesê: "Hierdie [opening] is nie net vir Stellenbosch nie, maar vir die hele land goeie nuus."
Ramjungernath het die Skool geloof vir sy bydrae tot die Universiteit se "visie vol waagmoed" om een van die top 100 universiteite wêreldwyd te wees. "Hierdie skool is die manifestasie van 'n visie wat die US aan die voorpunt van transdissiplinêre navorsing plaas." Hy het die eksponensi?le groei van die Skool en sy produktiewe navorsingsuitsette erken. Hy het bygevoeg dit het gehelp om die akademiese uitnemendheid van die Universiteit te dryf. Die Skool het deur sy werk gewys hoe om uitkomste in impakte te omskep wat die algemene publiek maklik kan raaksien, het Ramjungernath bygevoeg. "Rekenaarwetenskap kan 'n beduidende impak op die samelewing hê."
Rajaratnam het oor die eerste vyf jaar van die skool gesê: "Ons het wêreldwye samewerking én plaaslike relevansie bewerkstellig." Hy het met trots die wêreldklasnavorsers verbonde aan die Skool gevier, insluitende prof Tulio de Oliveira wat die Omicron-variant ontdek het en twee keer deur die Time-tydskrif vir sy werk vereer is; prof Francesco Petruccione, ontvanger van die Italiaanse Orde van die Ster en Direkteur van die Nasionale Instituut vir Teoretiese en Rekenaarwetenskappe; en prof Thulani Makhalanyane, ontvanger van die silwer medalje van die Suid-Afrikaanse Vereniging vir Biochemie en Molekulêre Biologie.
Rajaratnam het gesê die skool is doelbewus om datawetenskap vir studente, professionele persone en beleidmakers te ontsluit. Dit het al aanlyn kortkursusse en gratis werksessies aan meer as 10 000 studente verskaf. 'n Onlangse somerskool vir kuberveiligheid het meer as 3 000 studente gelok, terwyl meer as 3 500 studente vir 'n inleidende kursus in kodering geregistreer het.
Mylpaalprestasies sluit die bekendstelling van SERI en later die Beleidsinnovasielaboratorium en die bekendstelling van verskeie navorsingsleerstoele in, waarvan baie in samewerking met die Skool se vennote gedoen is.
"Ons beoog om te groei, br?e te bou en meer diepgaande samewerking met fakulteite, skole en eksterne entiteite te bewerkstellig." Van die belangrikste fokusareas sluit in om meer navorsers van nie-tradisionele vakgebiede na datawetenskap te bring, meer studentefinansiering te verkry en 'n nouer band tussen fakulteite en die skool te bou. "Ons nie-amptelike visieverklaring moet wees: Die Skool vir Datawetenskap en Rekenaardenke sal saam met fakulteite en skole werk om die Universiteit na die Top 100 te lei, het Rajaratnam oor die Skool se toekomsplanne gesê.
Onderskrif: Voormalige Rektor en nou Fondsinsamelings- en Strategiese Projekleier vir die Fakulteit Geneeskunde en Gesondheidswetenskappe (FGGW) en die Sentrum vir Epidemiese Reaksie en Innovasie (SERI), prof Wim de Villiers, en US se Rektor en Visekanselier, prof Deresh Ramjungernath vier die amptelike opening van die nuwe tuiste van die Skool vir Datawetenskap en Rekenaardenke saam met prof Tulio de Oliveira, Direkteur van SERI.
Foto: CERI Media, JikaJika Media?
