?Die Universiteit Stellenbosch (US) se studente en personeel het die strate op kampus ingevaar om Aardedag 2025 te vier met 'n stap en skoonmaak-aksie op 22 April 2025, en hulle verbind tot vanjaar se tema van #OurPowerOurPlanet – 'n beroep op almal om saam te staan vir skoner, hernubare energie sodat ons die gebruik van skoner elektrisiteit teen 2030 kan verdriedubbel.
Die deelnemers het die staptog en skoonmaak op die trappe van die US se Biblioteek afgesluit, waar hulle almal 'n memorandum onderteken het en 'n beroep op die US gedoen het om sy verbintenis tot omgewingsvolhoubaarheid te verdiep deur 'n ge?ntegreerde, verenigde en kampuswye volhoubaarheidsnetwerk te vestig. Die US se nuwe waarnemende Uitvoerende Bedryfshoof, prof Nicola Smit Met het die memorandum namens die Universiteit aanvaar en ons daaraan herinner dat omgewingsvolhoubaarheid een uitdaging is wat ons almal konfronteer en verenig – oor elke fakulteit, diensdepartement en studieveld heen. "Dit is nie net 'n modewoord nie: dit gaan oor die bou van 'n toekoms waar alle lewende wesens en ons aarde kan floreer. Ons vra nie meer hoe dit ons gaan raak nie. Die vraag is eerder hoe ons (gesamentlik en individueel) gaan reageer. Want omgewingsvolhoubaarheid begin hier, by elkeen van ons," het sy gesê.
Prof Smit het gesê die US neem aksie om van volhoubaarheid as 'n strategiese prioriteit en instaatsteller te beweeg na 'n gedeelde verantwoordelikheid. “Met ons Omgewingsvolhoubaarheidsplan mik ons na koolstofneutraliteit teen 2030 en netto-nul-vrystellings teen 2050. Die goeie nuus is dat ons omgewingsvolhoubaarheidsprojekte reeds 'n impak maak op ons kampus, wat meer as 487 geboue huisves. So, byvoorbeeld is ons aktief besig om na sonenergie oor te skakel met ons uitgebreide PV-paneelprojek en ons het verskeie waterwyse inisiatiewe in plek, asook 'n vullisstrategie waar ons oplossings verhoed dat onnodig vullis na landvul-hope gaan.
"Maar die ware krag lê by elkeen van ons," het sy gesê. "As studente en personeel is ons hier saam om ons toekoms te skep. Ons riviere huil en woude vervaag onder die gewig van keuses wat ons maak."
Met die oorhandiging van die memorandum aan prof Smit, het die US se Studenteraad se volhoubaarheidsportefeuljebestuurder, Ocean Postman, gesê die US is 'n plek waar studente holisties kan ontwikkel, hul akademiese ervarings verryk en afgeronde landsburgers word. “Klimaat raak ons almal en ons wil hierdie belofte saam met die Universiteit maak om ons te verbind tot volhoubaarheidsdoelwitte, as individue en as 'n kollektief."
Christine Groenewald, US se betrokkenheidbeampte vir volhoubaarheidsontwikkeling, en ons omgewingsvolhoubaarheidsbestuurder, John de Wet, van Fasiliteitsbestuur, het hierdie viering saam met die SR en ander organisasies op kampus gere?l.?
