?Die Universiteit Stellenbosch (US) het Dinsdag (25 Maart 2025) ? eredoktorsgraad aan die voormalige direkteur-generaal van die nasionale Departement van Wetenskap en Innovasie, dr Philemon Mphathi Mjwara, by die instelling se Maart-gradeplegtigheid verleen. Mjwara het het die graad Doktor in die Natuurwetenskappe (DSc), honoris causa, by ? gradeplegtigheidseremonie vir die Fakulteit Natuurwetenskappe ontvang.
Mjwara is vereer vir sy voortreflike prestasies as wetenskapbeleidvormer en -kampvegter, en sy uitsonderlike leierskapsbydrae om die wetenskap op nasionale én internasionale vlak te versterk en te bevorder.
Mjwara het in sy aanvaardingstoespraak gesê ons leef in 'n wêreld waar kunsmatige intelligensie (KI) 'n groot impak op ons lewens gaan hê. Hy het bygevoeg dat ons die uitdagings van KI sal moet hanteer.
“Hierdie uitdagings sal die vaardighede en oplossings vereis wat ho?ronderwysinstellings en die wetenskaplike gemeenskap kan verskaf.
“As 'n nuutaangestelde permanente verteenwoordiger van Suid-Afrika by Unesco (die Verenigde Nasies se Opvoedkundige, Wetenskaplike en Kulturele Organisasie) wil ek dus my steun belowe om voort te gaan om saam met die wetenskap-, innovasie- en tegnologiegemeenskap te verseker dat wat ons in Suid-Afrika geleer het oor die gebruik van kennis vir ontwikkeling en die wetenskap vir die oplossing van die probleme waarna ek verwys het, is belangrik."
Mjwara het sy toespraak afgesluit deur die US, die wetenskaplike gemeenskap en sy familie vir hul ondersteuning te bedank.
Die Dekaan van die Fakulteit Natuurwetenskappe, prof Burtram Fielding, het Mjwara gelukgewens en gesê: “Dr Phil Mjwara is 'n visioenêre leier wat bekend is vir sy beduidende bydraes tot die bevordering van wetenskap, tegnologie en innovasie in Suid-Afrika, die bre?r streek en internasionaal. Ons vier en eer sy toewyding om die ontwikkeling van die wetenskap regoor Suider-Afrika te bevorder."
Meer oor Mjwara
Dr Philemon (Phil) Mphathi Mjwara het die afgelope drie dekades aansienlik tot die ontwikkeling van Suid-Afrika se wetenskap-, tegnologie- en innovasiestelsel bygedra. As die voormalige direkteur-generaal van die nasionale Departement van Wetenskap en Innovasie, het hy gesorg dat die wetenskap gebruik word om alle Suid-Afrikaners se lewens te verbeter. Juis vir sy werk in hierdie hoedanigheid het hy in 2020 die Batho Pele Uitnemendheidstoekenning vir Direkteur-Generaal van die Jaar ontvang.
Een van Mjwara se vele bydraes tot die land se wetenskap-, tegnologie- en innovasielandskap was sy rol as leier van die span wat die eerste Suid-Afrikaanse vooruitskouingstudie op die terrein van wetenskap, tegnologie en innovasie (SAForSTI) onderneem het.
Mjwara het die graad HonsBSc (1984) en MSc (1987) aan die Universiteit van Fort Hare verwerf, sowel as 'n PhD (1995) aan die Universiteit van die Witwatersrand. Op akademiese gebied was hy onder meer professor in Wetenskap- en Tegnologiebeleid aan die Universiteit van Pretoria, en Fisika-dosent aan die universiteite van die Witwatersrand, Suid-Afrika en Fort Hare. Hy het etlike navorsingstukke oor fisika, tegnologie-ontleding en tegnologievooruitskouingsprosesse gepubliseer en aangebied.
Hy dien in 'n aantal advies- en oorsigrade, waaronder die direksies van die World of Platinum of South Africa en die Square Kilometre Array Organisation (SKAO). Hy is onlangs aangestel as Suid-Afrika se permanente verteenwoordiger by die Verenigde Nasies se Opvoedkundige, Wetenskaplike en Kulturele Organisasie (Unesco). In sy verskeie poste en – straks die belangrikste – as die land se langsdienende direkteur-generaal, het Mjwara 'n enorme bydrae gelewer tot wetenskapbeleide wat daarop gerig is om navorsers te ondersteun en vooruitgang in die Suid-Afrikaanse samelewing te bewerkstellig.
- Foto: Dr Philemon Mphathi Mjwara by die gradeplegtigheidseremonie. Fotograaf: Stefan Els
